Smartc9 Flashcard，中文

32個基本中文單字(連圖畫)

犬兒剛讀K1,中文真係好難教,始終講的同寫的字好唔同!比如你問佢「玩唔玩波波呀?」中文「波波」叫做「皮球」!但溝通上你唔通同佢講「你玩皮球嗎?」返咗一個月學,老師教咗三個中文字,就係「天」, 「早」, 「上」有一日,見到學校通告,告知家長上月他們在學校學了什麼(很詳細的)就諗住考下佢睇下識唔識!唔問都好地地,一問真係已為佢有讀寫障礙><!教咗45分鐘都分唔到呢三個字,講咗好耐呢個係「上」字,指住個「天」字問佢,佢話係個「落」字,成晚都無講過個「落」字,你係邊到作出來呀?那天是10月14日(好嘔血的一晚)

見到佢好慘,但又知道呢個只係一個開始,漫漫長路呀!中文同英文真係好唔同,英文講既同寫既係一樣, 點都係「ball」! 於是上網睇下點樣可以吸引到佢記得啲中文字,無意中找到中文字的由來(象形文字/甲骨文)覺得都幾有趣!老實講,如果唔係有一個3歲的仔,真係唔會無啦啦走去看象形文字!

嘗試搵一啲象形文字/圖畫,另一面寫個中文字,第一log我做咗13個,有以下的: 「上」「下」「大」「小」「人」「天」「水」「火」「口」「月」「雨」「山」「手」對摺再過膠!我知道坊間都有好多認字咭,但係自己做的咭可以就返小兒的進度同興趣,同埋同佢一齊做啲咭出來,佢好想要!

每日同佢玩一陣,講啱就比張咭佢,錯咗就比識答的爸爸!我是這樣教的…

「上」「下」字
1)  睇下枝筆係張枱的..佢會答「上面」順理成章你會話,所以呢個係個「上」字
2)  另外我會教佢「上」字嗰「一」畫好似張枱,「卜」字好似枝筆,如果枝筆係張枱上面就係「上」字,相反就係「下」字

「口」字
1)  比張認字咭有圖畫嗰面佢看下,跟住叫佢你「呀」呀?嘩,咁似你個口既?
2)  問下佢係咪一樣架?佢會答「係」咁顺勢話,所以呢個係個「口」字

就係咁樣,一個星期,呢13個字已經識晒(無看圖畫)原來小朋友可以學得咁快!為咗小朋友可以愉快學習,係教材方面總要花點心思!雖然花時間去做,但出來的效果好滿意!

32個基本中文單字手工咭(下載)
– 雙面製作(一面圖畫加小字,另一面純字)
– 約10cm x 7cm (大過2R少少)
– Print出來自行過膠,最後CUT做圓角,唔會刮到

Smartc9 練習，英文

英文單字大細楷Matching練習

英文大楷比較容易學,老師通常都係大細楷一齊教的,不過有好多字好易會記錯,比如係b,d,p,q,m,w,n! 上網搵到呢款練習可以考下佢地分大細楷 (自己改良過) 專登把易錯的字放埋一齊!我自己會把佢地過膠,用白板筆玩!玩完擦咗佢又可以再玩!呀仔試玩過,一個字「得」專登做到好handy,只有7.5 x 7.5cm,出去飲茶拿埋去都好方便!

英文大細楷Matcing練習(下載）
– 雙面設計,共13張咭(26個英文單字A to Z)
– 約7.5 x 7.5cm
– 過膠圓角
– 配合白板筆使用效果更佳(玩完擦掉再玩)

Smartc9 練習，英文，Flashcard

英文單字Matching圖畫練習

學識咗A-Z之後,我做咗呢個考下信信識唔識得運用，先問佢圖中圖畫的英文是什麼, 再叫佢圈住其第一個英文字母,講到又圈到就過關啦!

英文單字Matching圖畫(下載)
– 雙面設計,2面都有圖畫同字
– 未識大細楷前可當Flashcard玩
– 7.5cm x 7.5cm pocket size設計
– 配合白板筆,過膠後玩完擦咗佢可以再玩